ivanliresearch
patreon
醜股大翻身（港股篇）：以往唔掂嘅恒指成份股，係咪下年會掂？「一時時啦」。順手講下港股買乜股。仲有一堆Excel送
🕑 Added 2024-01-16 23:20:51 +0000 UTCExcel Monitor 大更新，自己keep一份吧，肯定有幫助
恒指成份股，標普成份股，債券，匯率，環球ETF，美股行業。齊晒
市值，年初至今表現，離高位低幾多，成交同平時比較，ETF AUM
順手多個Excel，比較下每年嘅成份股表現
睇下恒指成份股，係咪今年掂下年死，今年死下年掂？
2021掂嘅嘢，2022就死晒。2021唔掂嘅，2022就好返
但去到2022年 vs 2023，就唔係咁回事。咁點算？
2022同2023年兩年都好嘅公司，有乜共通點？兩年都差嘅呢？
2023恒指最好同最差又咩公司？今年又點？
咁即係，買乜港股好？
1. 美股今年好似唔係太掂，但其實個別股票做得幾好，而你計指數今年都仲係升，仲想點？港股就真係差，但亦冇計，反正都唔少人放棄狀態。
2. 無論如何，都係睇返「醜股大翻身」。
Excel Monitor 大更新，自己keep一份吧，肯定有幫助
3. 上次睇咗美股各個行業，兼且睇埋啲ETF。我仲幫你放埋呢堆行業ETF落去個Monitor 嘅Excel，放埋在呢度畀你。另外你見到仲多咗恒指所有成份股，同埋標普500嘅所有成份股。
4. 連埋之前嘅環球股市ETF，匯價，債券及其他ETF，仲有啲美國小銀行（有一排多人問，遲下我唔夠位應該會刪走）。都係個幾全面嘅東西，特別啱啲本身唔係做金融，公司冇Bloomberg 之類嘅讀者。
恒指成份股，標普成份股，債券，匯率，環球ETF，美股行業。齊晒
5. 你見入面好多嘢我都整咗，最重要你可以睇到市值，年初至今表現，離高位低幾多，成交同平時比較（睇下有冇異動），ETF就睇到AUM（管理資產規模），自己慢慢玩。日期方面，「年初至今」已經update咗去2024年（之前係2023）
6. 都話今年嘅目標係整多啲呢啲嘢，陸續有嚟，相信會幾有用，特別係慳返你好多時間。唔使到臨急臨忙你先問有乜好買，邊隻AUM夠大。
市值，年初至今表現，離高位低幾多，成交同平時比較，ETF AUM
7. 今篇另一個東西，都係一個簡單Excel，送埋畀你。十分簡單，打頭同尾兩日嘅日期，就睇到股價變動，對我地嘅分析極有用。美股同港股都做到，歐洲部份可以，日本股唔得。你在Column A自己摸索下，例如打 2318 HK，或者NVDA US咁，多數都會彈到隻股票出嚟，唔得嘅自己再研究下。
8. 當然亦可以在Google Sheet度做，但綜合考慮，都係Excel方便快捷，啱最多人
順手多個Excel，比較下每年嘅成份股表現
9. 整呢個東西嚟做乜？因為我地就要睇，到底係咪真係有得「醜股大翻身」。咁至少back test下，睇下之前幾年做得最差嘅指數成份股，係咪下年就翻生？做得好好嘅，係咪下年就冇運行？
10. 咁好肯定，一定有例外，有啲股升足咁多年，有啲衰足咁多年。但，in general睇情況，同埋我地亦睇下點fine tune個策略。甚至你唔同意我嘅，你自己玩亦都得。我嘅做法一向係畀埋啲料你自己玩。
睇下恒指成份股，係咪今年掂下年死，今年死下年掂？
11. 咁首先，睇港股先，當熱下身。話定你知，港股就似乎唔係好work，咁大家都知呢幾年港股有啲結構性問題
12. 上圖呢堆，就係2021年表現最好同最差嘅恒指成份股。你可以特別留意埋恒指本身全年嘅變幅。今次我知個圖度有，但平時呢？所以都係keep返一啲自己嘅data．今次我又Attach返個舊Excel畀你，有恒指每年表現
13. 當然另一樣嘢，拎堆冧把去個「頭尾股價」Excel back test下，大約見到啲數都係準嘅（有時會爭少少，原因不詳細解釋，不外乎係多一日少一日，或者除息之類）
14. 然後點？睇下最好嗰三隻嘢。去到2022年，兩隻都死得好慘，一隻就冇事幾好。拉埋三隻，平均輸27%。然後2022年，恒指「只係」跌16%。可見2021年表現最好嘅3隻，去到2022年就大跑輸。大約見到個pattern．咁但你只睇一隻中石油，就冇得講。另外，你問做乜係3隻唔係5隻？答唔到你。明報個圖畀3隻我咪做3隻，你可以自己做5隻，10隻都得
2021掂嘅嘢，2022就死晒。2021唔掂嘅，2022就好返
15. 睇埋2021年最差嗰三隻嘢，去到2022年，喂，OK喎。隻阿里巴巴係仲要輸多年，跑輸大市添。但三隻計晒，加埋有得賺少少。咁已經跑贏跌16%嘅恒指成條街！
16. 明報個圖有埋科指，所以我睇埋2021年嘅科指。最好最差，就係呢幾隻。
17. 咁睇下，去到2022年又點？2021年最好嗰3隻，去到2022年，平均輸37%，三隻都跑輸恒指。至於2021年最差嗰3隻？喂，2022年兩隻有得升，一隻就要跌兼跑輸恒指。三隻加埋要輸6%，但都係好過恒指
18. 咁真係睇到，至少在2021/2022年，呢個「往年掂下年衰，往年衰下年掂」嘅情況，都幾明顯。
但去到2022年 vs 2023，就唔係咁回事。咁點算？
19. 咁不如睇多年啦，睇埋2022年
20. 2022年，表現最好同最差嘅恒指成份股，就係上面幾隻。你特別可以留意，2021年尾二嘅海底撈，去到2022變第二。2021年第二嘅舜宇，去到2022年就變包尾！你話個效應明唔明顯？
21. 睇返2022年最好同最差嗰堆，去到2023年又乜表現？
22. 出嚟，就係咁嘅一回事。都懶得逐隻講，但你應該睇到，2022年最好嗰5隻，去到2023，整體都唔係太差！有兩隻有得升（而2023恒指跌15%），5隻夾埋都仲跑贏大市
23. 更不幸嘅係，5隻2022最差嘅，去到2023年，表現普遍都仲幾差，得一隻有得升，其他四隻跌之餘仲要跑輸大市，5隻加埋亦係跑輸大市。
2022同2023年兩年都好嘅公司，有乜共通點？兩年都差嘅呢？
24. 咁即係，2021同2022比，似乎就幾work．但2022同2023比，就唔太work？似乎正係咁。原因不明
25. 咁可以點？幾時都話冇包生仔。但幾個想法。首先，你好得閒嘅，可以睇埋再之前嘅年份，畢竟我只係同你睇咗兩年（21/22，22/23）嘅例子啫。咁會唔會22/23係好個別嘅情況？我依稀記得，之前嘅年份，都係傾向支持「今年掂下年衰，今年衰下年掂」
26. 另外，亦會下篇睇埋美股，似乎美股個情況就明顯啲。但我都未睇晒啲數，唔敢肯定
27. 第三：至少事後睇，你會見到2022/2023嘅情況，都仲搵到啲原因。2022好掂而2023都仲掂嗰兩隻，聯通同中海油，都真係因為派到息，同埋個盈利保持到。你睇匯控中移動中石油情況都差不多。所以，都真係搵啲派到息嘅公司吧（但呢樣嘢都要小心判斷下）
28. 同樣地，你見2022好衰而2023繼續衰嘅公司，主要就真係碧桂園同碧桂園服務，呢啲就真係「爆煲」嘅公司，所以最好都避開（雖然同上一段一樣，都要花小小時間先大約知，但至少中移動新地怕且是不會爆煲的，舉例）
29. 咁所以？可以點？雖然冇乜人會買港股，但都即管講下。之前都提過，當然搵啲有息派而又派到嘅公司，長江基建同領展都會係。
2023恒指最好同最差又咩公司？今年又點？
30. 咁如果睇埋恒指2023最好同最差表現嘅公司，即係上面呢堆。又會唔會有乜啟示？即管試下
31. 先睇舊年包尾嗰五隻，就只得隻藥明生物今年跑贏，美團李寧可能都OK？中升唔熟，碧桂園服務我就唔會掂的。睇下頭三隻，今年會唔會跑返贏恒指？
32. 至於舊年最好嗰5隻，我一隻都冇（但有匯控中移動頂住，所以舊年港股倉都好過恒指）。石油股就唔識睇了，都有啲讀者有買，始終一路派到息，我估OK啩。但我亦唔會而家買。你見呢5隻，整體今年亦係跑輸大市的！
33. 咁即係點？港股嘅嘢，我估多數人都冇乜買。我都仲每個月買些少，但新錢都係其他市場多，EMXC IDEV。真係買港股嘅，可能都係睇派到息嘅公用股，又或者香港公司。始終有個譜
咁即係，買乜港股好？
34. 至於我平時買嗰啲，不再重覆，搵舊文「埃汾倉」會見到。都係嗰句，舊年係跑贏恒指不少，仲要未計派息
35. 下篇應該終極，睇埋美股，過去幾年，又係咪見到「醜股大翻身」？
36. 最後一提，如果你想睇晒舊年所有恒指成份股嘅表現，我都attach咗個ｔtext only嘅Monitor excel畀你，就係凍結在舊年年尾的。美股標普500都有齊，反正下篇會講
Comments
植田和男成日暗示結束寬鬆貨幣政策, 坊間甚至覺得今年會轉向, 這樣的話日股會唔會大逆轉?
Excel 某啲Column B 出咗 #VALUE! Thanks.
