ivanliresearch
patreon
［最終回］美股全年跌市，下年又會點？仲有，最差嘅股災下，幾多年回家？迷失十年呢？60-40又點？
🕑 Added 2024-01-04 19:00:32 +0000 UTC港股開局又差，美股開局又差，今年股市可能麻麻地？
好啦，咁美股如果全年跌，再下年又會點？ — 其實照計你估到！
美股95年歷史，有26年下跌。咁打後一年，會點？
原來美股全年下跌，之下一年，有69%機會升
索羅斯：除咗睇輸贏比率，仲要睇埋回報！
咁所以，你會睇到「物極必反派」定「趨勢派」正確
但個個都係升時飛入去，跌時就唔敢買
不過最後一個警告：跌市後嘅一年，最差回報，可以輸四成幾。
嗰三年美股，夾埋輸你62%！
咁嗰恐怖嘅三年，又坐幾耐可以回家？ 遠比你想像中快
「但最正嘅係，回完家，即時又股災！」
已經拎到最差嘅情況畀你睇。咁睇下有乜得著？
而如果60-40，就真係打二次大戰你都在水面，幾咁好
Bonus：如果美股迷失十年時，60-40又幾耐回家？
呢篇就當後記，基本上完咗個系列。要講仲有好多嘢講，但下篇講下個股，講下2024買乜股啦（提示：唔買美國大科技股）
1. 照計唔應該用幾日嘅表現估全年，我亦唔肯定有冇數字支持（遲下又可以做下），但港股開局差，美股開局都麻麻地，會唔會預示今年冇舊年咁好？但亦唔使太在意，好多嘢你控制唔到，管理你嘅期望，跌嗰時咪可以買多啲，投資唔止睇一年。美股嘅，舊年咁好，今年差過舊年，根本只係數學現象。你今期六合彩中四個字，下期就多數冇今期咁好。
港股開局又差，美股開局又差，今年股市可能麻麻地？
2. 上篇戲肉，應該大家滿意，就畀你睇到「美股升完20%後，下一年雖然平均仲有得升，亦多數有得升」，但明顯平均升幅同贏錢次數，已經低過「所有年份」。好合理，升咗唔少嘛。
3. （特別留意，「平均有得升」同「多數有得升」，係兩回事。我可以十次得一次升，但升嗰時升100倍，跌時係1%，咁拉勻都係「平均有得升」，但唔係「多數有得升」。好多人嫌我長氣，但又經常搞亂啲嘢）
4. 上次亦用咗啲美股數字，講股票係好東西。反正有數字在手（呢篇都有attach畀你），今年開局又麻麻地。不如睇下，美股跌完一年，打後一年又會點？ — 希望年尾唔好要用到。
好啦，咁美股如果全年跌，再下年又會點？ — 其實照計你估到！
5. 留意：如果你夠醒嘅，根本唔使我講，唔使計數，應該都估到結論：跌完一年去買，當然值博率高，仲會「高過平時」。但係咪真？我地又研究下。
6. 我話畀你知，我寫上面段嘢時，甚至數字都未睇！但已經估到。點解咁有信心？就證明咗：股市真係有規律嘅，只係唔係好似自然現象咁明顯。
美股95年歷史，有26年下跌。咁打後一年，會點？
7. 之前講過，美股95年歷史，有26年（佔所有年份27%）錄得下跌。咁之後嘅一年會點？
原來美股全年下跌，之下一年，有69%機會升
8. 先睇次數，美股全年跌之後，下一年有69%嘅情況，係正回報。算係幾高，高過「升完20%之後」再錄得正回報嘅次數（65%升） — 呢個全不意外啦，係咪？
9. 但呢個69%嘅比率，反而係低過「所有年份」（73%）—呢個結果我都估唔到。於是你心諗，「又話跌完買抵啲？但贏錢機會仲少過「所有年份」」
索羅斯：除咗睇輸贏比率，仲要睇埋回報！
10. 所以上面同你講：除咗睇贏輸比率，仲要睇埋回報。重覆返索羅斯嘅名句：重點唔係你贏幾多次輸幾多次，重要睇埋贏嗰時你贏幾多，輸嗰時你輸幾多
11. 咁睇返呢26個跌市嘅年份，打後一年，平均回報13%，中位數回報22%— 咁就極明顯好過「普通年份」，又更加好過「升完20%」嘅年份
12. 所以？雖然「跌完之後嘅年份」，贏率唔係特別高 — 但平均回報，係好高。所以，依然係好值博！我嘅直覺冇錯。
咁所以，你會睇到「物極必反派」定「趨勢派」正確
13. 結論？好簡單。如果你計一年年，係升開一路升，定升得多就跌跌得多就升，似乎係後者。亦即係「物極必反派」，比較正確。
14. 我講到煩嘅一句：跌嗰時唔買，唔通升晒先買？當然大家唔信服，個個都係升嗰時就衝入去，跌時就唔敢買。因為你唔信「鐘擺」。
但個個都係升時飛入去，跌時就唔敢買
15. 但睇數字，明顯見到，跌完之後嘅年份買，好過「普通年份」。而「普通年份」，又好過「升完20%」嘅年份。下次跌市，唔使驚。我甚至搵次可以做埋「熊市下買，會點」
16. 你睇：咪全部返返去我地講嘅嘢—估值好重要。升完20%，當然冇咁值搏。但唔係叫你沽晒佢。點應對？之前咪講咗！
不過最後一個警告：跌市後嘅一年，最差回報，可以輸四成幾。
17. 不過最後畀個小小警告你：雖然，真係跌市時買值搏率係高，潛在回報亦大。但，「跌市後嘅一年」，最差回報，係43.8% — 呢個數字有冇印象？正係美股最差回報嘅一年！
18. 亦即係，1930年跌完25%，「你諗住飛入市，埃汾話跌市後買多數幾好」，之後1931年再跌多44%！唔止，1932年再跌多9%！我估九成幾以上嘅人，一定自此遠離股票。
嗰三年美股，夾埋輸你62%！
19. 計下，三年夾埋，即係乜後果？即係輸幾多%？就唔係25+44+9= 78%（小學數學呀下）。實際上，三年你輸62%，即係100蚊輸剩38.2蚊
20. 不過，唔係玩嘢：「聽落，又冇你想像中咁多喎」。真的，你之前買Nvidia Facebook Netflix，一年高位都跌七成啦！但埃汾三隻都有，咪又係咁捱過咗！仲上返水面添！
咁嗰恐怖嘅三年，又坐幾耐可以回家？ 遠比你想像中快
21. 咁你話，仲長坐？遇著嗰三年咁恐怖，打後幾多年先回家？留意，100蚊輸剩38.2，輸咗62%後，回家要升返162%
22. 又畀你估下，追返162%，要幾多年？
23. 答案：一樣係3年多少少！股票嘅嘢，升起上嚟唔係講笑。但你低位打靶，或者止蝕，或者覺得「人生有幾多個3年」，就冇仇報。
24. 呢個十分簡單嘅Excel，畀埋你玩，大約就係計「幾多年回家」
「但最正嘅係，回完家，即時又股災！」
25. 不過，更加正點嘅係：「大跌3年，3年後回家」—之後又點？「又再大跌！」。之後反彈1年，再跌多3年！痴線的。因為，世界大戰呀
26. 但，呢3年之後，也是坐多2年就回家。打後，直頭海濶天空。
已經拎到最差嘅情況畀你睇。咁睇下有乜得著？
27. 有乜得著？可以有幾個。首先，股市就係大上大落架啦，但一般都係升多過跌，而升時升得多，跌時跌得相對少。
28. 第二，你見，都真係要坐得耐，time is your friend，當時美股又係挫上挫落，玩足10年先修成正果，之後海濶空。如果話「人生有幾多個10年」嘅，幫你唔到。
29. 第三，當然了，如果分段入市嘅，就更早已經回咗家。上次寫美股迷失十年咪講過。
而如果60-40，就真係打二次大戰你都在水面，幾咁好
30. 第四，同樣地，如果你係60-40嘅，就更加快回家啦。打後幾年二次大戰，你都一路仲係在水面呀！幾開心！
31. 所以60-40真係有佢嘅吸引力，再講一次，股票衰時，債券往往好，或者冇咁衰，係做到分散的。
32. 不過第五：呢堆真係成100年前嘅東西。知唔知最大分別係乜？我相信，當年市場波幅，係大過而家嘅（你可以嚴謹地計下）。一來美國經濟體系而家已經成熟咗好多，二來當年參與嘅資金亦冇咁多。所以，而家應該冇咁多大起大落嘅。
Bonus：如果美股迷失十年時，60-40又幾耐回家？
33. 最後，既然整開呢個「回家」Excel—你亦會見到，所謂美股迷失十年，其實係咪真係咁可怕？06年你已經回家啦。當然你話6年都好長嘅，人生有幾多個6年，等唔到，咁我幫你唔到。
34. 如果你60-40，更好。科網大爆破都好，2003年，一年你就回家啦，使乜驚？
35. 遲下寫美股迷失十年，我會講多次。但基本上答咗你，可以點預防點應對。仲有，就係買埋其他市場。
36. 當然了，你見呢兩個例子講60-40好，係因為股災啫。升市時，60-40梗係跑輸，咁針冇兩頭利。但我覺得，最好你就100%股票，真係受唔到嘅，就60-40囉。點都要stay 100% invested （40%債當然都係invest）。
Comments
買咩債？美債的話咪Search United States Treasury然後揀年期
指数ETF
Ivan,請問如果想買債券指數，減息環境下應该買長定短duration？有那些可買？
BLK
Ivan, 請問如何在IB買債？謝謝
