ivanliresearch
patreon
［減息，一樣係買股票］（四）— 睇下各款美債ETF。記住睇Duration，買得大當然賠得大。但，TLT高位跌咗一半，ZROZ高位跌七成 – 同科技股差唔多，但反彈力度爭好遠
🕑 Added 2023-11-29 12:55:02 +0000 UTC美債ETF：由SHY到ZROZ，好短都好長都有。買得大賠得大囉
睇債券ETF，唔止睇回報，唔係睇幾高息，仲要特別留意Duration
Duration唔係睇幾時拎得返錢！債券ETF，你係拎唔返錢的！
因為債券ETF係永續，所以你唔會拎得返本。你嘅回報亦不能事先確定
Duration，即係sensitivity，高風險高回報。睇錯邊，輸得勁過股票
ZROZ：三年回報 負24% — 唔係三年輸24%，係每年24%！
近排TLT 低位升10%，ZROZ升16%添，比得上股票。但之後呢？
問題係，今年跑輸成條街喎。仲有，之後呢？
TLT高位跌一半，ZROZ高位跌七成。同科技股差不多，但反彈力度爭好多
1. 最後快講埋，債券ETF。首先，五花八門，任何古靈精怪嘢都有。我只講大路嘅東西。
美債ETF：由SHY到ZROZ，好短都好長都有。買得大賠得大囉
2. 我個Monitor Excel都有。美債嘅，短咪SHY，長啲IEI。再長啲嘅，呢排好多人講，有啲讀者都買咗嘅，TLT。仲有隻超長嘅，ZROZ，陣間講多啲。 想炒雜燴嘅，咪GOV。如果唔止美債，想撈埋其他美國嘢嘅（但都係高評級），AGG
3. 仲有其他古靈精怪嘢，High yield又有（以前叫「垃圾債」，改個名即時好聽好多），齋玩新興市場嘅又有，浮息嘅亦有，對號入座。不能每隻都講，但呢個表有嘅，都唔會太過伏 — 唔係話你唔會輸錢，但即係唔會掛羊頭賣狗肉。咁你買新興市場債嘅ETF，然後新興市場風暴嘅，當然你會輸錢。
睇債券ETF，唔止睇回報，唔係睇幾高息，仲要特別留意Duration
4. 你要睇嘅，唔只係歷史回報，甚至唔係個yield，而係個「存續期」，Duration．
5. 存續期唔完全等於「有幾耐到期」，但係差不多嘅概念。咁你ETF嘅，入面一大抽cashflow，個duration就係成堆嘢嘅平均．另外留意，如果係浮息債，Duration極短。你見隻浮息ETF，Duration近乎零
6. Duration有乜重要？留意，並唔係你幾時拎得返錢！再講一次，呢堆ETF，你係拎唔返錢的！
Duration唔係睇幾時拎得返錢！債券ETF，你係拎唔返錢的！
7. 例如我買隻SHY，1至3年嘅國債。咁你話，即係一籃子，1至3年到期，咁我去到3年，應該全部收返晒錢啦？ 錯！錯得很！呢隻嘢係永續嘅。到下年，佢又會換啲新嘅債券入去，永遠保持住入面嘅嘢係1至3年（亦即係唔夠1年嘅，踢走）（我諗起Leonardo Di Carpio，佢就keep住個Duration 25年，原理差不多）
8. 所以，你係永世唔會「拎返錢」的
9. 呢個特色好重要 — 因為相對於「直債」，你買呢啲嘢嘅回報，係唔會預先知道嘅。你可以估算，但同直債你一早知晒幾時收息幾時收本，完全唔同。
因為債券ETF係永續，所以你唔會拎得返本。你嘅回報亦不能事先確定
10. 不過，有辣有唔辣。你買債券ETF，因為永續，變咗理論上你嘅upside可以大啲，唔會cap得咁低。仲有，你唔需要面對所謂嘅「reinvestment risk」—即係，我買隻3年債，到期我拎返錢，又唔知拎去做乜好，到時可能已經低息（但當然，到時低息嘅，你啲債券ETF一樣受影響，但至少啲錢唔會返返你度又煩一大輪）
11. 上面講咗，留意Duration好重要。唔係同你幾時拎得返錢有關，而係同「風險」有關。
Duration，即係sensitivity，高風險高回報。睇錯邊，輸得勁過股票
12. Duration既係大約代表「有幾耐到期」，但實務上，亦代表個sensitivity。乜sensitivity？你隻ETF對息口上落嘅敏感度。假設其他嘢不變（咁你背後堆國家違咗約就另一回事），duration 遠長嘅ETF，對息口越敏感。
13. 亦即係話，TLT ZORZ之類，息口郁少少，個價就郁好多。點郁？講過啦，債息升債價咪跌，掉轉都係。咁敏感度高，係好事定壞事？「視乎你買唔買得中囉」
14. 所以，duration長嘅嘢，亦即係買得大賠得大。買中回報當然好好多，但輸咗後果亦嚴重好多。亦即係，duration就係「風險」啦小朋友
ZROZ：三年回報 負24% — 唔係三年輸24%，係每年24%！
15. 費話小講，睇實例，再睇佢個表。最低嗰格，ZROZ，26年嘅 Duration（即係坐住晒啲30年美債），三年回報 負24% — 拿，呢度睇你有幾細心睇圖啦。有冇留意張圖右上角？呢個三年回報負24%，唔係隻嘢坐三年75折—而係每年都75折！因為係年度化咗。每年75折，自己計到了，三年100蚊輸隻40蚊多啲。
16. 所以你話買債「低風險」嘅，think again．特別再提你，呢堆嘢，你係沒有拎返本金嘅一日。但當然了，因為過去3年債息一路升啫，到債息跌，反彈亦快。
17. 但例如你睇上兩格，IEF，duration 7.5年，三年回報「只係」負8% — 三年，每年輸8%，就即係三年100蚊輸到75蚊咁。
18. 當然仲有更殘忍嘅一樣嘢：你睇10年回報，絶大多數都係1%2%，通脹都跑唔贏。跑輸股票幾條街。
19. 咁但，當然係因為當下係債息高，債價殘啦。打後幾年，應該靚仔啲。但依然係嗰句，照計好難跑贏股票。
20. 無論如何，我都係建議你買股票。但當然我唔係一定啱，但你想買債的話，都留意返上面嘅東西，特別係Duration嘅問題。
近排TLT 低位升10%，ZROZ升16%添，比得上股票。但之後呢？
21. 都係嗰句，減息，估債息跌，好難話錯。特別係你見到，近排真係升喎。
22. 我買隻TLT，低位都升10%啦，真係及得上股票。
23. 我買隻ZROZ嘅，一個月執16%，好過你買股票
問題係，今年跑輸成條街喎。仲有，之後呢？
24. 問題係，呢啲只係事後畫圖。況且，你留意下張圖。TLT今年仲要輸緊10%，ZROZ今年輸緊16%。唔好話你買Nvidia Facebook 咁屈機，只係今年買SPY，都15%回報唔止。呢兩隻嘢跑輸近30%，幾耐先追得返？
TLT高位跌一半，ZROZ高位跌七成。同科技股差不多，但反彈力度爭好多
25. 況且，之前嘅事都未講。TLT高位跌咗一半，ZROZ仲誇張，高位跌咗六成幾，得返三份一 — 真係同之前我地講Facebook Netflix Nvidia差不多
26. 但問題嚟啦，我買債咋喎，都要受咁嘅drawdown（更唔好講好多讀者輸20%已經叫救命），咁我不如買股票啦！為乜要受咁大風險？何況，明顯地即使去到ZROZ，反彈力度，都冇可能同股票比 — 呢期可能差不多，但長遠呢？
27. 你以為買債ETF冇風險嘅，可以睇多次。高位跌一半甚至六七成，你仲唔叫救命？仲未計係跑輸股票一大截。當然嚟緊幾年應該唔會再咁，但再之後呢？
28. 加息周期應該已經完。你話TLT ZROZ未來幾年仲會唔會高位跌一半？可能性極低。但個盲點又嚟啦： 投資，唔係睇幾年的。
29. 所以真係唔複雜，拉長嚟睇，債券差不多實跑輸股票。只要你買股票受得起啲波動就得。點受？寫過無數次，少啲睇股票啦，坐長啲啦，都幫到你。
Comments
萬一係額外嘅Currency Loss呢？
如果買非美元貨幣的IG 長債券，可享額外的currency gain？
Good point
